အုပ်ချုပ်မှုဒါရိုက်တာ၏ အိတ်ဖွင့်ပေးစာ

အစုရှယ်ယာရှင်များသို့

ကိုယ်စိတ်နှစ်ဖြာ ကျန်းမာချမ်းသာပြီး ကိုဗစ်-၁၉ ကပ်ရောဂါဘေးမှ ကင်းဝေးကြပါစေကြောင်း ဆုမွန်ကောင်း တောင်းအပ်ပါသည်။

ယခုအိတ်ဖွင့်ပေးစာသည် ၂၀၂၀-၂၀၂၁ ဘဏ္ဍာရေး နှစ်အတွင်း ဆောင်ရွက်ခဲ့သော လုပ်ငန်းများ၊ ဘဏ္ဍာရေးအခြေအနေများနှင့် ရှေ့ဆက်ဆောင်ရွက်မည့် လုပ်ငန်းများအကြောင်းကို ရှယ်ယာရှင်းများ သိရှိနိုင်ရန် ရှင်းလင်းတင်ပြထားကြောင်း ပဏာမအစီရင်ခံအပ်ပါသည်။

ကပ်ရောဂါနှင့် နိုင်ငံရေးအခက်အခဲ

၂၀၁၉ နောင်းပိုင်းမှစပြီး ယခုဘဏ္ဍာရေးနှစ်အထိမြန်မာ နိုင်ငံတွင် ကိုဗစ်-၁၉ ကူးစက်မှု မြင့်မားလျက်ရှိသေးသည်ဟု ယူဆနိုင်ပါသည်။ အိမ်နီးချင်းများနှင့် နှိုင်းယှဉ်လျှင် မြန်မာ နိုင်ငံ၏ ကိုဗစ်ကာကွယ်ဆေး ထိုးနှံ ပြီးစီးမှု ရာခိုင်နှုန်း နည်းနေသေးခြင်းကြောင့်လည်း ဖြစ်နိုင်ပါသည်။

ဤ ၂၀၂၀ – ၂၀၂၁ ဘဏ္ဍာရေးနှစ်တွင် မိမိတို့ တန်ဖိုးထားရသော စာရင်းစစ်ပညာရှင် ဆရာကြီး ဦးစိန်ဝင်းနှင့် အင်ဂျင်နီယာ ဘူမိဗေဒပညာရှင် ဆရာကြီး ဦးအောင်သင်းတို့ ထာဝရ ခွဲခွာသွားခြင်းမှာလည်း မိမိတို့ ကုမ္ပဏီ၏ ဆုံးရှုံးမှုကြီးတစ်ခု ဖြစ်ပါသ ည်။

ကုမ္ပဏီအနေဖြင့် ဤကဲ့သို့ ကပ်ရောဂါနှင့် နိုင်ငံရေး မတည်ငြိမ်မှု အခက်အခဲများကြားတွင် ကုမ္ပဏီလည်ပတ်မှု အရှိန်အဟုန် ကျဆင်းမသွားစေရန် အဖက်ဖက်မှ သတိကြီးစွာဖြင့် ထိန်းသိမ်း ကြီးကြပ် ပဲ့ကိုင် ဆောင်ရွက်ခဲ့ပါသည်။ သို့သော်လည်း ကျပ်ငွေနှင့် နိုင်ငံခြားငွေ လဲလှယ်နှုန်း မတည်ငြိမ်ခြင်း၊ တည်ဆောက်ရေး လုပ်ငန်းသုံးပစ္စည်းများ လွယ်လင့်တကူ မဝယ်ယူနိုင်ခြင်း၊ မြန်မာ-တရုတ် နယ်စပ်ကုန်သွယ်ရေး ကန့်သတ် ပိတ်စို့ခြင်း၊ အချို့ လုပ်ငန်းများကို အွန်လိုင်းမှတစ်ဆင့်သာ ဆောင်ရွက်နိုင်ခြင်း စသည်တို့ကြောင့် ရည်မှန်းထားသည့်အတိုင်း ခရီးမပေါက်ခဲ့သော် လည်း အောက်ပါ စီမံကိန်းလုပ်ငန်းများကို ရယူဆောင်ရွက် နိုင်ခဲ့ပါသည်။

စီမံကိန်းများ

၁။ မူဆယ်ဗဟိုစီးပွားရေးဇုန်၏ Zone-4B

နယူးစတားလိုက် ဆောက်လုပ်ရေး ကုမ္ပဏီလီမိတက်မှ ရင်းနှီးမြှုပ်နှံသည့် မူဆယ်ဗဟိုစီးပွားရေးဇုန်စီမံကိန်း ပင်မဇုန်များ၏ အခြေခံအဆောက်အအုံပိုင်းများကို အားလုံးနီးပါးအကောင်အထည် ဖော်ဆောင်ခဲ့ပြီးဖြစ်ပါသည်။ လူနေအိမ်ရာအပိုင်းများဖြစ်သည့် Villa Zone များကိုမူ အခြေအနေအရ တစ်ဆင့်ချင်း အကောင်အထည် ဖော်ဆောင်ရာတွင် ဤနှစ်အတွင်း ၁၈ ဧကကျယ်ဝန်းသည့် Zone 4-B ရှိ လမ်းများကို တည်ဆောက်ပြီးစီးခဲ့ပါသည်။

၂။ ငွေဇင်ယော်အိမ်ရာစီမံကိန်း၏ လမ်းတည်ဆောက်ခြင်းလုပ်ငန်း

ဒေသအတွင်းရှိ လုပ်ငန်းရှင်အချို့မှ အကောင်အထည်ဖော်လျက်ရှိသော ငွေဇင်ယော်အိမ်ရာစီမံကိန်းသည် မူဆယ်မြို့နယ်၊ နမ့်ပန်းကျေးရွာအုပ်စု၊ နမ့်ခွမ်ကျေးရွာ၏ နယ် နိမိတ်အတွင်းဖြစ်ပြီး စက်မှုကွက်သစ်၏ အနီးဝန်းကျင်တွင်လည်း တည်ရှိပါသည်။ အဆိုပါစီမံကိန်း၏ ၅၉၀ မီတာ ရှည်လျားသည့် လမ်းအတွက် မြေသားလမ်းဖော်ထုတ်ခြင်းလုပ်ငန်း၊ ဗြုန်းအခြေခံလွှာတည်ဆောက်ခြင်းလုပ်ငန်းနှင့် လမ်းအတွက် လိုအပ်သည့် အသင့်ဖျော်ကွန်ကရစ်ထုတ်လုပ်ပံ့ပိုးခြင်း လုပ်ငန်းများကို ဆောင်ရွက်ခဲ့ရပါသည်။

၃။ မူဆယ် မြို့တွင်းလမ်း တင်ဒါလုပ်ငန်းများ

၂၀၂၀-၂၀၂၁ ဘဏ္ဍာရေးနှစ်အတွင်း မြို့နယ်စည်ပင်သာယာရေးဌာနမှ တင်ဒါစနစ်ဖြင့် ခေါ်ယူဆောင်ရွက်သည့် မူဆယ်မြို့တွင်း တည်ဆောက်ရေးလုပ်ငန်းများအနက် အချို့ကွန်ကရစ်လမ်းခင်းခြင်းလုပ်ငန်းများကို တင်ဒါဝင်ရောက်ယှဉ်ပြိုင်အောင်မြင်ပြီး လုပ်ကိုင်ဆောင်ရွက်ခွင့် ရရှိခဲ့ပါ သည်။ ယင်းတို့မှာ –

(က) စက်မှုလမ်းကွန်ကရစ်ခင်းခြင်းလုပ်ငန်း

စက်မှုလမ်းကွန်ကရစ်ခင်းခြင်းလုပ်ငန်းသည် ဂရိတ်ဟော်ခမ်းမှ တင်ဒါအောင်မြင်ဆောင်ရွက်ခွင့်ရခဲ့သည့် လုပ်ငန်းတစ်ခုဖြစ်ပါသည်။ စက်မှုလမ်းသည် မူဆယ်မြို့၊ ကောင်းမူးတုံရပ်ကွက်၊ ဟိုနားနယ်မြေအတွင်းတွင် တည်ရှိပြီး စက်မှုကွက်သစ်သို့ သွားရောက်ရာ အဓိကလမ်းဖြစ်သည်။ အဆိုပါလမ်းသည် မြို့နယ် စည်ပင်သာယာရေး ဌာန၏ ၂၀၂၀-၂၀၂၁ ဘဏ္ဍာရေးနှစ်ဘတ်ဂျက် ခေါင်းစဉ်အောက်တွင် တည်ဆောက်သည့်လမ်းဖြစ်ပြီး ပေ ၁,၂၀၀ အရှည်ရှိသည့်လမ်းကို မူလ ၁၂ ပေအကျယ် ကတ္တရာလမ်းမှ ၁၈ ပေအကျယ် ကွန်ကရစ်လမ်း အဖြစ်သို့ အဆင့်မြှင့်တင် တည်ဆောက်သည့်လမ်းဖြစ်သည်။

(ခ) ၄၅ ကုန်းလမ်းကွန်ကရစ်ခင်းခြင်းလုပ်ငန်း

၄၅ ကုန်းလမ်းကွန်ကရစ်ခင်းခြင်းလုပ်ငန်းသည် ဂရိတ်ဟော်ခမ်းမှ တင်ဒါအောင်မြင်သည့် နောက်ထပ်လုပ်ငန်းတစ်ခုဖြစ်ပါသည်။ ၄၅ ကုန်းလမ်းမကြီးသည် မူဆယ်မြို့၊ ဟိုမွန်ရပ်ကွက်အတွင်းတွင်တည်ရှိပြီး နာနတ်ကုန်းအပိုင်းမှသည် ၄၅ ကုန်းအပိုင်းများသို့ ဆက်သွယ်ထားသည့် ပင်မလမ်းကြောင်းကြီးဖြစ်ပါသည်။ ၎င်းလမ်းသည် ၂၀၂၀-၂၀၂၁ ဘဏ္ဍာရေးနှစ်အတွင်း Clean & Green City ဘတ်ဂျက်ခေါင်းစဉ်အောက်တွင် ဆောင်ရွက်ရသည့်လမ်းဖြစ်ပါသည်။ အရှည်အားဖြင့် ၂,၅၃၀ ပေ၊ အကျယ် ၁၈ ပေရှိသည့် လမ်းလုပ်ငန်းကို ၂ ပိုင်းခွဲပြီး ဆောင်ရွက်ခဲ့သည်။

လုပ်ငန်းဆောင်ရွက်သည့်အချိန်တွင် ကိုဗစ်-၁၉ ကပ်ရောဂါ တတိယလှိုင်းဖြစ်ပွား၍ ဒေသတွင်း အသွားအလာ ကန့်သတ်မှုကြောင့် ဘိလပ်မြေပြတ်တောက်မှု၊ မြန်မာ-တရုတ် နယ်စပ်ဖြတ်သန်းရေး ဂိတ်များပိတ်ပင်မှု စသည့် အခြေအနေများကြောင့် လုပ်ငန်းဆောင်ရွက်မှုကာလမှာ ခန့်မှန်းထားသည်ထက် ကြန့်ကြာခဲ့ရသည်။

၄။ လွယ်တိန်ခမ်းလမ်းကွန်ကရစ်ခင်းခြင်းလုပ်ငန်း

မူဆယ်မြို့၏ အထင်ကရဖြစ်သည့် လွယ်တိန်ခမ်းတောင်တော်သည် အများပြည်သူတို့ လာရောက်လည်ပတ် အနားယူချင်စဖွယ်ကောင်းလှသည့် နေရာတစ်ခုဖြစ်သည်။ လွယ်တိန်ခမ်းတောင်ပတ်လမ်းသည် အဝင်မုခ်ဦးမှသည် ရှမ်းနှစ်သစ်ကူးကျင်းပရာပွဲခင်း၊ လွယ်တိန်ခမ်းဓမ္မာရုံ၊ ဗောဓိကုန်း (လျောင်းတော်မူဘုရား)၊ သဗ္ဗညုစုမ့်မိန်း စေတီတော် (မိုင်းဖုန်းစေတီတော်)၊ ပြည်တော်ပြန်ဘုရား၊ မဟာသန္တိသုခ ရပ်တော်မူဘုရားကုန်း၏ အတက်မုခ်ဦး စသည်တို့ကို ဖြတ်သန်း၍ တောင်တော်၏ အမြင့်ဆုံးနေရာတွင် တည်ထားသည့် သုဝဏ္ဏမိဂဒါ မဟာစေတီတော်သို့ ပေါက်ရောက်သည့် လမ်းဖြစ်ပါသည်။

အဆိုပါလမ်းကို ကွန်ကရစ်လမ်းအဖြစ် အဆင့်မြှင့်တင်ရန်အတွက် ၈-၁-၂၀၂၁ ရက်နေ့တွင် လွယ်တိန်ခမ်း ဘုရားကျောင်း၏ ဦးစီးပဓာနနာယကဆရာတော်ဖြစ်သော တောင်တန်းသာသနာပြု ဆရာတော် ဘုရားကြီး ဘဒ္ဒန္တ သုခမိန္ဒ၏ မိန့်မှာချက်နှင့်အညီ လိုအပ်သည့်တိုင်းတာမှုများပြုလုပ်ပြီးနောက် လမ်းနှင့်သက်ဆိုင်သည့် Geometric Design, Structure Design များရေးဆွဲခြင်း၊ ခန့်မှန်းခြေ ကုန်ကျစရိတ်များ တွက်ချက်ခြင်း စသည်တို့ကို ဆောင်ရွက်ခဲ့ပါသည်။ ထို့နောက် ၂၄-၂-၂၀၂၁ ရက်နေ့မှစ၍ အရှည် ၇,၉၀၈ ပေရှိသောလမ်းကို မူလ အကျယ် ၁၈ ပေ ကတ္တရာလမ်းမှ အကျယ် ပေ ၃၀ ကွန်ကရစ်လမ်းအဖြစ်သို့ အပိုင်း ၃ ပိုင်းခွဲကာ စက်ယန္တရားများဖြင့် လမ်းချဲ့ခြင်းလုပ်ငန်း၊ အောက်ခံမြေသားပြုပြင် တည်ဆောက်ခြင်းလုပ်ငန်း၊ ဗြုန်းအခြေခံလွှာခင်းခြင်းလုပ်ငန်း၊ ကွန်ကရစ်ခင်းခြင်းစသည်ဖြင့် တစ်ဆင့်ချင်းဆောင်ရွက်ခဲ့ပါသည်။ ထိုသို့ဆောင်ရွက်ရာ၌ လမ်းခင်းခြင်းနှင့် ဆက်စပ်လျက် အချင်း ၂ ပေ၊ အရှည် ၃၉ ပေရှိ ကွန်ကရစ်ရေပြွန်တစ်စင်းနှင့် အချင်း ၂ ပေ၊ အရှည် ၃၂ ပေရှိ ကွန်ကရစ်ရေပြွန်တစ်စင်းတို့ကိုလည်း တည်ဆောက်လှူဒါန်းပေးခဲ့ပါသည်။

၅။ ကျင်စန်းကျော့ နယ်စပ်ကုန်စည်ဖလှယ် ကားကြီးကွင်းစီမံကိန်း

ကိုဗစ်-၁၉ တတိယလှိုင်းကာလတွင် မြန်မာ – တရုတ် နယ်စပ်ကုန်သွယ်မှုအား ၂၀၂၁ ခုနှစ်၊ မတ်လ၌ စတင်ရပ်ဆိုင်းထားခဲ့သဖြင့် ပြည်ပပို့ကုန်/သွင်းကုန်ကိုအခြေခံပြီး လုပ်ငန်းဆောင်ရွက်နေသော စိုက်ပျိုး တောင်သူများ၊ စီးပွား ရေးလုပ်ငန်းရှင်များ၊ ကုန်စည်ပို့ဆောင်ရေးလုပ်ငန်းများနှင့် နယ်စပ်နေ ပြည်သူလူထုတို့ အခက်အခဲ အကြပ်အတည်းများစွာ ရင်ဆိုင်ကြုံတွေ့ခဲ့ရပါသည်။

အဆိုပါ အခက်အခဲ အကြပ်အတည်းများကို ကိုဗစ်-၁၉ ကပ်ရောဂါ ကြိုတင်ကာကွယ်ရေးနှင့် ထိန်းချုပ်ရေး လုပ်ငန်းစဉ်များနှင့်အညီ ဖြေရှင်းနိုင်ရန်အတွက် နှစ်နိုင်ငံအစိုးရ ညှိနှိုင်းမှုများဆောင်ရွက်ခဲ့ပြီးနောက် မူဆယ်မြို့နယ်၊ လွယ်အင်ကျေးရွာတွင် Closed Loop Management စနစ်ဖြင့် နယ်စပ်ကုန်သွယ်မှုလုပ်ငန်းများ ပြန်လည်စတင်နိုင်ရန် ရွှေလွယ်အင်ကုမ္ပဏီမှ ယာယီခေါက်တို နယ်စပ်ကုန်စည်ဖလှယ်ရေး ကားကြီးကွင်း စီမံကိန်းအား ရင်းနှီးမြှုပ်နှံဆောင်ရွက်ခဲ့ပါသည်။

သွင်းကုန်/ထုတ်ကုန် ဖလှယ်ကွင်းများပါဝင်သည့် ဧက ၂၀ အကျယ်အဝန်းရှိသော အဆိုပါစီမံကိန်းအား မိမိတို့ ဂရိတ်ဟော်ခမ်းမှ ကန်ထရိုက်စနစ်ဖြင့် ၂ လအတွင်းအပြီးဆောင်ရွက်ခဲ့ပြီး ၂၂.၁၁.၂၀၂၁ ရက်နေ့မှ ၂၅.၁၁.၂၀၂၁ ရက်နေ့အထိ ကွန်တိန်နာများဖြင့် စမ်းသပ် ကုန်သွယ်မှုဆောင်ရွက်ခဲ့ကာ ၂၆.၁၁.၂၀၂၁ ရက်နေ့မှစ၍ နှစ်နိုင်ငံကုန်သွယ်မှုအား ကွန်တိန်နာများဖြင့် စတင်လည်ပတ် ဆောင်ရွက်နေပြီဖြစ်ပါသည်။

၆။ နမ့်ဆန်ရေလှောင်တမံစီမံကိန်း

Cornerstone Resources (Myanmar) Limited မှ ရှမ်းပြည်နယ်မြောက်ပိုင်း၊ လားရှိုးခရိုင်၊ လားရှိုးမြို့နယ်၊ ခေးနင်းအုပ်စု၊ ခါးသျှိကျေးရွာအနီးတွင် လည်ပတ်ထုတ်လုပ်လျက်ရှိသော သတ္ထုသန့်စင်စက်ရုံအတွက် လိုအပ်သော စက်ရုံသုံးနှင့် သောက်သုံးရေများအတွက် မြေအောက်ရေ (အဝီစိရေ) အစား အနီးရှိ နမ့်မွန်ချောင်း ရေအရင်းအမြစ်ကိုအသုံးပြုကာ မြေသားတမံတည်ဆောက်၍ မြေပေါ်ရေများစုဆောင်းပြီး တမံရေဖြင့် အသုံးပြုနိုင်ရန် မိမိတို့ ဂရိတ်ဟော်ခမ်း နှင့် Energy Reliable Ace Co., Ltd. တို့မှ ကျွမ်းကျင်ပညာရှင်များ ပူးပေါင်းပြီး စီမံကိန်းဖြစ်မြောက်နိုင်စွမ်း စူးစမ်းလေ့လာမှုများဆောင်ရွက်ခဲ့ပါသည်။ အဆိုပါ မြေသားတမံသည် 14 မီတာအမြင့်ရှိပြီး ရေ ကုဗမီတာ ၁ သန်းပမာဏ သိုလှောင်နိုင်မည်ဖြစ်သည်။

စီမံကိန်း အကောင်အထည်ဖော်ဆောင်ခွင့်ကို လားရှိုးခရိုင်စီမံအုပ်ချုပ်ရေးအဖွဲ့သို့ တင်ပြထားပြီး ခွင့်ပြုမိန့် ရရှိပြီးဖြစ်ပါသည်။ လက်ရှိတွင် မိမိတို့ ဂရိတ်ဟော်ခမ်းမှ အကြံပေးအရာရှိများ၊ ကျွမ်းကျင်ပညာရှင်များ၊ ကျွမ်းကျင်လုပ်သားများ၊ စက်/ယာဉ်/ယန္တရားများအသုံးပြု၍ အရည်အသွေးပြည့်မီစွာဖြင့် ယခုအစီရင်ခံသည့်ကာလတွင် စတင် အကောင်အထည်ဖော်ဆောင်မည်ဖြစ်ပါသည်။

ရင်းနှီးမြှုပ်နှံမှုလုပ်ငန်းများ

၁။ နမ့်ပေါ် ရေအားလျှပ်စစ်စီမံကိန်း

နမ့်ပေါ်ရေအားလျှပ်စစ်စီမံကိန်းသည် မူဆယ်မြို့ရှိ နမ့်ပေါ်ချောင်းရေအရင်းအမြစ်ကို အသုံးပြုတည်ဆောက်မည့် တပ်ဆင်စက်အင်အား ၂၀ မဂ္ဂါဝပ်ရှိ လျှပ်စစ်စီမံကိန်းတစ်ခုဖြစ်ပြီး ကုမ္ပဏီ၏ အဓိကကျသော ရေရှည်ရင်းနှီးမြှုပ်နှံမှုတစ်ခုလည်း ဖြစ်ပါသည်။ စီမံကိန်းလုပ်ကိုင်ဆောင်ရွက်ခွင့်ရရှိရန် ၂၀၁၃ ခုနှစ်မှ စတင်အဆိုပြုတင်ပြခဲ့ပြီး နားလည်မှုစာချွန်လွှာရေးထိုးခြင်း၊ ပဋိညာဉ်စာချုပ်ချုပ်ဆိုခြင်း၊ မြန်မာနိုင်ငံရင်းနှီး မြှုပ်နှံမှုကော်မရှင်၏ခွင့်ပြုမိန့်ရရှိခြင်း၊ ESIA Scoping Proposal ခွင့်ပြုမိန့်ရရှိခြင်း၊ ဓာတ်အားဝယ်ယူရေး သဘောတူစာချုပ် လက်မှတ်ရေးထိုးခြင်းစသည့် အဆင့်ဆင့်သော ဖွံ့ဖြိုးမှုလုပ်ငန်းစဉ်များကို ၂၀၁၈ ဇူလိုင်လတွင် ဆောင်ရွက် ပြီးစီးခဲ့ပြီး တည်ဆောက်မှုအနေနှင့် အကြိုအင်ဂျင်နီယာလုပ်ငန်းများကို ကြိုတင်ဆောင်ရွက်ထားရှိပြီး ဖြစ်ပါသည်။

ကုမ္ပဏီအနေဖြင့် ပဋိညာဉ်စာချုပ်လက်မှတ်ရေးထိုးပြီးချိန် ၃ နှစ်တာ ကာလအတွင်း နိုင်ငံခြားငွေကြေး လဲလှယ်မှုနှုန်းထား ရုတ်တရက်အဆမတန်မြင့်တက်ခြင်း၊ ဒေသတွင်း လက်နက်ကိုင်ပဋိပက္ခများ မကြာခဏဖြစ်ပွားခြင်း၊ ကိုဗစ်-၁၉ ကပ်ရောဂါနှင့် နိုင်ငံရေးမတည်ငြိမ်မှုများကြောင့် ဆောင်ရွက်ရန် အခက်အခဲများစွာ ကြုံတွေ့ခဲ့ရပါသည်။ ထို့ကြောင့် စီမံကိန်းသတ်မှတ်ကာလအတွင်း နှောင့်နှေးကြန့် ကြာမှုများ ဖြစ်ပေါ်ခဲ့ရသည့်အတွက် စီမံကိန်းသက်တမ်း တိုးမြင့်ပေးပါရန် လျှပ်စစ်နှင့်စွမ်းအင်ဝန်ကြီးဌာနမှတစ်ဆင့် မြန်မာနိုင်ငံရင်းနှီးမြှုပ်နှံမှုကော်မရှင်သို့ တင်ပြခဲ့သည့်အပေါ် စီမံကိန်းကာလသက်တမ်းအား ၂၀၂၁ ပြည့်နှစ်၊ နိုဝင်ဘာလ ၂၅ ရက်နေ့မှ ၂၀၂၃ ခုနှစ်၊ မေလ ၂၄ ရက်နေ့အထိ ၁၈ လကို ဒုတိယအကြိမ် ထပ်မံ တိုးမြင့်ဆောင်ရွက်ခွင့် လျှောက်ထားပါသည်။ ထို့အတူ ရင်းနှီးမြှုပ်နှံမှုအား ပိုမိုတွက်ခြေကိုက်မှုရှိစေရန်နှင့် ဘဏ္ဍာရေးစီမံခန့်ခွဲမှုများကို အဆင်ပြေချောမွေ့စွာ ဆောင်ရွက်သွားနိုင်ရန် ဓာတ်အားဝယ်ယူရေးသဘောတူညီမှုစာချုပ်ပါ အချက်အလက်များနှင့်အညီ ဓာတ်အားခတိုးမြှင့်ပေးနိုင်ရေးအတွက် လျှပ်စစ်နှင့်စွမ်းအင်ဝန်ကြီးဌာနသို့ တင်ပြလမ်းညွှန်မှု ခံယူထားပါသည်။

အခြားတစ်ဖက်တွင်လည်း စီမံကိန်းလုပ်ငန်းအတွက် လုပ်ငန်းဆောင်ရွက်မှုပုံစံအား ပိုမိုထိရောက်မှုရှိစေမည့် Business Model မျိုးဖြင့် လုပ်ကိုင်ဆောင်ရွက်သွားနိုင်ရေးအတွက် စီမံကိန်းအား စိတ်ဝင်စားကြသည့် စီးပွားရေးအဖွဲ့အစည်းများနှင့် ညှိနှိုင်းဆွေးနွေးပြင်ဆင်လျက်ရှိပါသည်။ စီမံကိန်းဧရိယာအတွင်း အကြိုအင်ဂျင်နီယာလုပ်ငန်းပိုင်း အသင့်ဆောင်ရွက်ထားရှိပြီးဖြစ်သည့်အတွက် မမျှော်မှန်းနိုင် သော ကိစ္စရပ်များ ဖြစ်ပေါ်ခြင်းမရှိပါက ၂၀၂၄ ခုနှစ်၊ နှစ်မကုန်မီတွင် လုပ်ငန်းများ အပြီးသတ်နိုင်ရေးအတွက် အားထည့်ကြိုးပမ်းဆောင်ရွက်သွားပါမည်။

၂။ ရေသဲ ထုတ်လုပ်ခြင်းလုပ်ငန်း

ရေသဲများကို ကုမ္ပဏီ၏ တည်ဆောက်ရေးကန်ထရိုက်လုပ်ငန်းများတွင်လည်းကောင်း၊ ကုမ္ပဏီ၏ ကွန်ကရစ် ထုတ်လုပ်မှုစက်ရုံအတွက်လည်းကောင်း၊ ပြင်ပဆောက်လုပ်ရေးလုပ်ငန်းများသို့လည်းကောင်း ထုတ်လုပ် ရောင်းချပေးလျက်ရှိပါသည်။ ၂၀၂၀-၂၀၂၁ ဘဏ္ဍာရေးနှစ်အတွင်း ကုမ္ပဏီ၏ ကွန်ကရစ်ဖျော်စက်ရုံနှင့် တည်ဆောက်ရေး ကန်ထရိုက်လုပ်ငန်းများအတွက် အလုံအလောက် ထုတ်လုပ်ပံ့ပိုးပေးနိုင်ခဲ့သော်လည်း ပြင်ပရောင်းအားမှာ ကိုဗစ်ကပ်ရောဂါ အခြေအနေများကြောင့် ရောင်းအားကျဆင်းခဲ့ရပါသည်။

၃။ အသင့်ဖျော်ကွန်ကရစ် ထုတ်လုပ်ခြင်းလုပ်ငန်း

အသင့်ဖျော်ကွန်ကရစ် ထုတ်လုပ်ခြင်းလုပ်ငန်းအတွက် ကွန် ကရစ်ဖျော်စက် (HZ60) ကို ၂၀၁၉ – ၂၀၂၀ ဘဏ္ဍာရေးနှစ်တွင် တည်ထောင်ခဲ့ပြီး မိမိတို့၏ တည်ဆောက်ရေးလုပ်ငန်းများတွင် အသုံးပြုသကဲ့သို့ ပြင်ပတည်ဆောက်ရေးလုပ်ငန်းများသို့လည်း ရောင်းချပေးလျက်ရှိပါသည်။ လက်ရှိ အစီရင်ခံသည့် ဘဏ္ဍာရေးနှစ်အတွင်း ကုမ္ပဏီ၏ တည်ဆောက်ရေး လုပ်ငန်းများတွက် စုစုပေါင်းကွန်ကရစ် ၇၁၀၀ ကုဗမီတာကို ထုတ်လုပ်ပံ့ပိုးပေးနိုင်ခဲ့ပြီး ပြင်ပလုပ်ငန်းများအတွက် စုစုပေါင်း ကွန်ကရစ်ပမာဏ ၂၂၄၈ ကုဗမီတာ ထုတ်လုပ်ရောင်းချနိုင်ခဲ့ပါသည်။

၄။ ကွန်ကရစ်ဓာတ်အားတိုးဆေးရည်ထုတ်လုပ်ခြင်းလုပ်ငန်း

မိမိတို့၏ ကုမ္ပဏီခွဲဖြစ်သော HPA Con-Gent Co., Ltd. သည် မန္တလေးမြို့တွင် စက်ရုံတည်၍ ကွန်ကရစ်ဓာတ်အားတိုးဆေးရည် ထုတ်လုပ်ခြင်းလုပ်ငန်းကို ဆောင်ရွက်လျက်ရှိရာ အစီရင်ခံသည့် ဘဏ္ဍာရေးနှစ်အတွင်း စုစုပေါင်းတန်ချိန် ၁၄၃.၅ တန်သာ ထုတ်လုပ်ရောင်းချနိုင်ခဲ့ပါသည်။

၃။ ကုမ္ပဏီခွဲများ ဖျက်သိမ်းခြင်း

ကုမ္ပဏီ၏ အထွေထွေ အသုံးစရိတ် လျှော့ချနိုင်ရန် ၂၀၁၉ -၂၀၂၀ ဘဏ္ဍာရေးနှစ်အတွင်း ဒါရိုက်တာအဖွဲ့၏ အစည်း အဝေးဆုံးဖြတ်ချက်အရ အဆိုပါစက်ရုံအား မူဆယ်မြို့သို့ ပြောင်းရွှေ့ထုတ်လုပ်ရန် လျာထားသော်လည်း ၂၀၂၀ နှစ်ကုန်ပိုင်းတွင် မန္တလေးတိုင်းအတွင်း ဖြစ်နိုင်ခြေရှိသော စီမံ ကိန်းအလားအလာကြောင့် မပြောင်းရွှေ့ ဖြစ်ခဲ့ပေ။ သို့သော် ကိုဗစ်ကပ်ရောဂါကြောင့်လည်းကောင်း၊ နယ်စပ်ကုန်သွယ်မှု ပိတ်ဆို့ခြင်းကြောင့် ကုန်ကြမ်းများ တင်သွင်းခြင်း မပြုနိုင်သောကြောင့်လည်းကောင်း၊ ငွေလဲလှယ်မှုနှုန်းထားကြောင့် ကုန်ကြမ်းဈေးနှုန်း အဆမတန်မြင့်မားခြင်းကြောင့်လည်းကောင်း၊ အထက်ဖော်ပြပါ အလားအလာရှိသော စီမံကိန်းကြီး မဖော်ဆောင်ဖြစ်သည့်ပြင် တည်ဆောက်ရေးလုပ်ငန်းကြီးများ နည်းပါးသွားခြင်းကြောင့်လည်းကောင်း စီးပွားရေးတွက်ချေကိုက်မှု မရှိသည့်အတွက် HPA Con-Gent Co., Ltd နှင့် Hor-Tech Co., Ltd တို့ကို လာမည့် ဘဏ္ဍာရေးနှစ်အတွင်း ဖျက်သိမ်းသွားရန် ဒါရိုက်တာအဖွဲ့သို့ တင်ပြပြီး အဆုံးဖြတ် ခံယူမည်ဖြစ်ပါသည်။

စီးပွားရေးဖွံ့ဖြိုးမှုကဏ္ဍ

စွန့်ပစ်အမှိုက်မှ ပြန်လည်အသုံးပြုနိုင်သော ကုန်ပစ္စည်းနှင့် ဓာတုဆေးရည် ထုတ်လုပ်မှု

မူဆယ်မြို့ အမှိုက်နှင့်မိလ္လာသိမ်းဆည်းရေး ဝန်ဆောင်မှုလုပ်ငန်းကို မူဆယ်မြို့နယ် စည်ပင်သာယာရေးကော်မတီနှင့် မိမိတို့၏ကုမ္ပဏီခွဲဖြစ်သော Twins Industry Limited တို့အကြား နှစ် ၃၀ (+၁၀+၁၀ = ၅၀ နှစ်) ဝန်ဆောင်မှု လုပ်ငန်းစာချုပ်ချုပ်ခဲ့ပြီး၊ ၂၀၂၀ ခုနှစ်၊ ဇွန်လ၊ ၆ ရက်နေ့တွင် လုပ်ငန်းများကို စတင်ဆောင်ရွက်ခဲ့ပါသည်။ လက်ရှိတွင် ဝန်ထမ်းနှင့် လုပ်သားအင်အား ၇၈ ဦး၊ စက်/ယာဉ်/ယန္တရားမျိုးစုံ ၂၇ စီးတို့ဖြင့် လုပ်ငန်းများ လည်ပတ်လျက် ရှိသည်။

အနာဂတ်လုပ်ငန်းများ အနေဖြင့် အမှိုက်မှ ပြန်လည်ပြည့်ဖြိုးမြဲစွမ်းအင်ထုတ်လုပ်နိုင်ရေးအတွက် မျှော်မှန်းချက် ထားရှိပါသည်။ ပထမခြေလှမ်းအဖြစ် အမှိုက်မှ ဓာတုဆေးရည်ထုတ်လုပ်နိုင်ရန် အိန္ဒိယနိုင်ငံမှ ကုမ္ပဏီတစ်ခုနှင့် ချိတ်ဆက်ကာ Online Meeting များပြုလုပ်၍ အပြန်အလှန် ဆွေးနွေးခဲ့ပါသည်။ ပလပ်စတစ်ညစ်ညမ်းမှု လျော့ချရေးနှင့် သဘာဝပတ်ဝန်းကျင် အသိအမြင် ဖန်တီးမြှင့်တင်ရေးများအတွက် အကျိုးအမြတ်မယူဘဲ ပူးပေါင်းဆောင်ရွက် အကြံပေးလျက်ရှိသော ရန်ကုန်မြို့ရှိ သန့်မြန်မာကုမ္ပဏီနှင့်ချိတ်ဆက်၍ Online Meeting များ ပြုလုပ်ကာ ၎င်း၏ လမ်းညွှန်မှုဖြင့် မူဆယ်မြို့မှ ထွက်ရှိသော အမှိုက်များကို အမျိုးအစား ၂၅ မျိုး ခွဲခြားခြင်း၊ ထွက်ရှိမှုနှုန်းများ ဆန်းစစ်ခြင်းတို့ကို ဆောင်ရွက်ခဲ့ပါသည်။

အမှိုက်မှ စွမ်းအင်ထုတ်လုပ်ခြင်း၊ ဆယ်တင်ပစ္စည်းများ ပြန်လည်ရောင်းချခြင်း၊ ဓာတုဆေးရည်များ ထုတ်လုပ်ခြင်း၊ သဘာဝမြေသြဇာများ ထုတ်လုပ်ရောင်းချခြင်းစသည်တို့ကို ဆောင်ရွက်ခြင်းဖြင့် ကုမ္ပဏီ၏ ဝင်ငွေနှင့် အကျိုးအမြတ် တိုးစေမည်ဖြစ်ပါသည်။

ရန်ကုန်စတော့အိတ်ချိန်း

အစုရှယ်ယာရှင်များအတွက် မိမိတို့ပိုင်ဆိုင်သော အစု ရှယ်ယာများကို လွတ်လပ်စွာ ရောင်းဝယ်နိုင်ရေးအတွက် ရန်ကုန်စတော့အိတ်ချိန်း (YSX) သို့ စာရင်းဝင်နိုင်ရေး ကြိုးပမ်းခဲ

သော်လည်း မလိုလားအပ်သောကုန်ကျစရိတ်များ မရှိစေရေးအတွက်လည်းကောင်း၊ အစုရှယ်ယာရှင်အကျိုးကို ပိုမိုဖြစ်ထွန်းစေရန်အတွက်လည်းကောင်း မိမိတို့ ကုမ္ပဏီဘက်မှ ခိုင်မာသော ရင်းနှီးမြှုပ်နှံမှု ရှိပြီးမှသာ၊ တစ်နည်းအားဖြင့် နမ့်ပေါ်ရေအားလျှပ်စစ် စီမံကိန်းကဲ့သို့ စီမံကိန်းအား အကောင်အထည်ဖော်ဆောင်ပြီးမှသာ ဈေးကွက်အခြေအနေကို သုံးသပ်ပြီး ရန်ကုန်စတော့အိတ်ချိန်း (YSX) သို့ ဝင်သင့်က ဝင်မည်ဖြစ်ကြောင်းကို ၁၁.၁၁.၂၀၂၀ ရက်နေ့တွင် ကျင်းပပြုလုပ်သော ဒါရိုက်ဘုတ် အဖွဲ့အစည်းအဝေးတွင် ဆုံးဖြတ်ချက်ချမှတ်ထားပါသည်။

ဘဏ္ဍာရေးကဏ္ဍ

၂၀၂၀ – ၂၀၂၁ ဘဏ္ဍာရေးနှစ်တွင် ကပ်ရောဂါကူးစက်ပြန့်ပွားမှုအပြင် နိုင်ငံရေး မတည်ငြိမ်မှုများသည် တည်ဆောက်ရေးလုပ်ငန်းကဏ္ဍအပါအဝင် စီမံကိန်းလုပ်ငန်းများကို အဆမတန် နည်းပါးသွားစေသည်။ ယင်းနှင့်ဆက်စပ်ပြီး ဖြစ်ပေါ်လာသည့် ကျပ်ငွေတန်ဖိုး တဟုန်ထိုး ကျဆင်းမှုမှာလည်း ကုမ္ပဏီ၏ အကျိုးအမြတ်ဖော်ဆောင်မှုကို ထိခိုက်စေခဲ့ပါသည်။ ကုမ္ပဏီ၏ နိုင်ငံခြားငွေဖြင့် ပေးရန်ရှိများကို နှစ်ဆနီးပါး ပေးဆပ်နေရသကဲ့သို့ဖြစ်သည်။

ထို့ပြင် နယ်စပ်ကုန်သွယ်ရေး ပိတ်ဆို့မှုနှင့် အသွား အလာ ကန့်သတ်ပိတ်ဆို့မှုများသည် တည်ဆောက်ရေး စီမံကိန်းများအတွက် အသုံးပြုရန်လိုအပ်သော ကုန်ကြမ်းများနှင့် စက်ကိရိယာများ ဝယ်ယူရေးအတွက် အခက်အခဲ များစွာ ဖြစ်စေပါသည်။ ယင်းတို့ကြောင့် ရရှိထားသောကန်ထရိုက်လုပ်ငန်းမှာ နှောင့်နှေးကြန့်ကြာခြင်း၊ ဆွေးနွေးထားသော လုပ်ငန်းသစ်များ ဆိုင်းငံ့မှုပြုကြခြင်းများ ဖြစ်စေကာ လုပ်ငန်းလည်ပတ်မှုပိုင်းကိုပင် အလျဉ်မပြတ်အောင် ထိန်းမ’ထောက်ကန်နေရသကဲ့သို့ ဖြစ်သည်။ နိုင်ငံအဝှမ်း အခြားသော တည်ဆောက်ရေး လုပ်ငန်းများ တွေ့ကြုံ ရင်ဆိုင်ခဲ့ရသကဲ့သို့ မျှော်မှန်းထားသည့်အတိုင်း အကျိုးအမြတ်ဖော်ဆောင်နိုင်ခြင်း မရှိခဲ့ပါ။ ထို့ကြောင့် တင်ပြပါ ဘဏ္ဍာရေးနှစ်အတွက်လည်း အစုရှယ်ယာရှင်များသို့ အမြတ်ဝေစုခွဲပေးနိုင်ခြင်းမရှိပါကြောင်း တင်ပြအပ်ပါသည်။ ဘဏ္ဍာရေးအစီရင်ခံစာအရ ၂၀၂၀-၂၀၂၀၁ ကုန်ဆုံးချိန်တွင် ကုမ္ပဏီ၏ ဘဏ္ဍာရေးအခြေအနေ အချုပ်မှာ အောက်ပါအတိုင်းဖြစ်ပါသည် –

ကုမ္ပဏီ၏အသားတင်ပိုင်ဆိုင်မှုမှာ 13,895.95 ကျပ်သန်း၊
ရှယ်ယာတစ်စောင်၏ စာရင်းတန်ဖိုးမှာ 1,945.18 ကျပ် ဖြစ်ပါသည်။

မနှစ်က ရှယ်ယာတန်ဖိုးနှင့် နှိုင်းယှဉ်ပါက ရှယ်ယာတစ်စောင်လျှင် တန်ဖိုးအားဖြင့် 75 ကျပ်ခန့် ကျသွားကြောင်း တွေ့ရပါသည်။

နိဂုံး

အချုပ်အားဖြင့် ဆိုရသော် ၂၀၂၀-၂၀၂၁ ဘဏ္ဍာရေးနှစ်သည် ရှေ့နှစ်ကဲ့သို့ ကပ်ရောဂါကို အလူးအလိမ့် ခံနေရသည့်အပြင် လုံးဝမထင်မှတ်ခဲ့သည့် နိုင်ငံရေးမတည်ငြိမ်မှုဒဏ် ရင်ဆိုင်နေရသည့် နှစ်တစ်နှစ်ဖြစ်သည်။ အခြားတစ်ဖက်တွင် ကွတ်ခိုင်-မူဆယ်-နမ့်ခမ်း ဒေသတွင်း တိုက်ပွဲများကြောင့် နယ်မြေအေးချမ်းတည်ငြိမ်မှုမရှိခြင်း၊ ကပ်ရောဂါဆိုးကြီး ကျရောက်ခြင်း၊ ငွေကြေးလဲလှယ်နှုန်း မတည်ငြိမ်ခြင်းများသည် နယ်စပ်ကုန်သွယ်ရေး ကုန်စည်စီးဆင်းမှု နှောင့်နှေးစေခဲ့ပြီး ဒေသ၏ စီးပွားရေးလုပ်ငန်းများအား ထိခိုက်သည့် အကျိုးသက်ရောက်မှု ဖြစ်ပေါ်ခဲ့ပါသည်။

ဤကဲ့သို့ အခက်အခဲနှင့်စိန်ခေါ်မှုအမျိုးမျိုး ကြားတွင် ဂရိတ်ဟော်ခမ်း၏ ဝန်ဆောင်မှုအရည်အသွေးပေါ် ယုံကြည်မှု မပျက်ဘဲ အစဉ်အားပေးသော လုပ်ငန်းအပ်နှံသူများနှင့် ဖောက်သည်များရှိနေခြင်း၊ တာဝန်သိပြီး တာဝန်ကျေပွန်သော လုပ်ဖော်ကိုင်ဖက်များနှင့် ဝန်ထမ်းကောင်းများ၊ ယုံကြည်အားပေးရသော အစုရှယ်ယာရှင်များ၊ နယ်ပယ်အသီးသီးမှ ပညာရှင်များ၊ ထိန်းကျောင်းမောင်းနှင်လာသည့် အဆင့်ဆင့်သောဦးဆောင်သူများ၊ လမ်းမှန်သို့ရောက်အောင် အကြံကောင်းဉာဏ်ကောင်းများ ပေးခဲ့ကြသူများ ရှိနေခြင်းတို့ကြောင့်ပင် ယနေ့အထိ ကုမ္ပဏီ လည်ပတ်မှု အရှိန်မပြတ်ဘဲ ဆက်လက်ရပ်တည်နိုင်ခဲ့သည်။ အားလုံးကို မိမိစိတ်ဝမ်းမှ နက်ရှိုင်းစွာ အထူးကျေးဇူးတင်ပါသည်။

လွန်ခဲ့သော ဘဏ္ဍာရေးနှစ် သုံးနှစ်အတွင်း အစု ရှယ်ယာရှင်များအား အမြတ်ဝေစု မပေးနိုင်မှုအပေါ် မိမိအနေဖြင့် များစွာ စိတ်မကောင်းဖြစ်မိပါသည်။ သို့သော် မိမိတို့အနေနှင့် ရေရှည်ကာလအတွက် အလားအလာကောင်းများကို ဖန်တီးပေးရင်း ရေတိုကာလအတွင်း အခြေအနေများပေးလာပါကလည်း အစုရှယ်ယာရှင်များအားလုံးအဖို့ အကျိုးအမြတ်များကို ဆောင်ကြဉ်းပေးနိုင်ရန် ကြိုးပမ်းသွားမည်ဖြစ်ပါသည်။

ရှေ့လျှောက်တွင်လည်း မိဘပြည်သူများ၏ မေတ္တာကိုခံယူရင်း ပြီးခဲ့သည့်ကာလများက ရရှိလာခဲ့သည့် အတွေ့အကြုံကောင်းများကို အကျိုးရှိစွာအသုံးချလျက် ပိုမိုကောင်းမွန်သောဘဝကို ဖန်တီးသွားမည် ဖြစ်ပါကြောင်း အစီရင်ခံတင်ပြအပ်ပါသည်။